Asturies Celta

El pueblu y la cultura celtes anicien nuna fastera oriental, los Kurganes, asitiada ente Europa y la India, poro, a estes xentes nómase-yos "indoeuropees". Esti área, güei del sur de Rusia, abarcaría mesmo les zones mostañoses de la Cordalera'l Cáucaso, que la parte baxa de les estepes allugaes al so pie, entrambos los dos mares Caspio y Negro. Dende ellí, pel 2000 enantes de la nuesa Era, al empar qu'otros pueblos indoeuropeos, les vagues celtes invadieron Europa.

Estos Protoceltes, de mano asítiense en delles fasteres d'Europa del Este: Hungría, Bulgaria, Rumanía, asina como nos países balcánicos. Dende esti área, de magar la Edá del Bronce, treslládense asitiándose fondamente pel suroeste d'Alemaña, este de Francia y bona parte de lo que güei ye Suiza, y ye entós cuando los historiadores entamen a llamalos "Celtes". Darréu, na Edá del Fierro, nos sieglos VII al V enantes de la Era, arramárense per amplies rexones d'Europa invadiendo Alemaña, Francia y la Península Ibérica, asina como les Islles Britániques. Pel sieglu III enantes de la Era, los celtes en nueves vagues tornen otra vuelta pal Este ya invaden el norte d'Italia, Bohemia, Silesia, los países balcánicos... algamando fasta l'Asia Menor. Poro, na dómina del so mayor puxu, los celtes yeren el pueblu más abondosu y característicu d'Europa, penriba inda que los Xermanos.

Na Península Ibérica esta cultura espárdese pela mayor parte de la so xeografía, sacante parte del sur y tola faza mediterránea. Los principales pueblos célticos penínsulares yeren los Celtíberos (Celtes d'Iberia) qu'arramaben per bona parte de les dos Castielles y Aragón; los Lusitanos, una amplia fastera de lo qu'anguaño ye Portugal y pa finar, los Galaicos, Ástures y Cántabros pel noroeste y la mariña cantábrica. De magar el so finxu cimeru, sieglos III-I enantes de la Era, la cultura celta atapez énte l'emburrión que carez per dos llendes: pel sur l'Imperiu Romanu, ya pel norte los Xermanos. Van galdiendo énte esti puxu fasta'l desaniciu la so independencia, fasta l'escaezu la so identidá cultural na mayor parte del so territoriu hestóricu, fasta ser romanizaos, xermanizaos, o darréu cristianizaos. Fernando y Pindy nuna biesca astur.

Sicasí, hebo pequenes fasteres arrequexaes au la llaceria nun foi perdafechu, sitios onde abellugó'l biltu de la resistencia cara a eses nueves cultures, de tala miente qu'aende se caltuvo meyor l'aliendu del so pasáu cultural celtiegu. Eses zones tán allugaes nel norte, oeste o noroeste. Nun hai qu'escaecer que, por exemplu na Península Ibérica, 150 años depués de conquistada cuásique toa Hispania, nel norte inda quedaben dos pueblos ensin domeñar: los Ástures ya los Cántabros, que yeren descritos poles cróniques de los hestoriadores llatinos de la dómina como "los pueblos más poderosos de Hispania". Poro, la romanización d'estos pueblos foi percurtia y fincando mayormente na fastera de la mariña. Daqué asemayao pasara n'otros países de la Celtia hestórica, de tal xeitu que los qu'anguañu se consideren países celtes son los heriedes d'aquella tradición cultural, xustamente los que güei en díi participen ca branu nel "Festival Intercélticu de Lorient", na Bretaña. Estos países son: Eire, Alba, Mannin, Cymru, Kernow, Breithz, Asturies ya Galiza.

 

Una de les característiques de la música celta ye una métrica pricurosa y complexa qu'amiesta una musicalidá y ritmu que puen sonar dacuando mui brétigos y aliellos, dacuando señardosos ya murnios; ya inclusu orientales cuando son a afondar nos sos raigaños centroasiáticos. El patrimoniu de la música popular celta yera bayurosu en cancios relixosos, polifoníes cencielles y temática so l'amor, la guerra ya la caza.

Fernando nuna antigua braña de tradición celta n'Asturies

No que cinca a los instrumentos orixinarios ye de sulliñar la bayura de xiblates estremaes, la farpa céltica (típicu instrumentu de los bardos), la gaita o cornamusa (propiu de bretones, irlandeses, escoceses, asturianos ya gallegos), la bombarda (que n'España tien un pariente averáu na dulzaina), el vigulín, el curdión, ya los instrumentos de percusión primitivos tradicionales como los panderos, tambores o bodhram.

El patrimoniu cultural d'esta civilización foi codificáu al traviés del tiempu, recoyíu especialmente polos estudiosos a lo cabero'l sieglu XIX. Otra parte taba vivo na cultura tradicional d'estos países: na so música folclórica, nes sos dances y bailles, na so etnografía, nos sos vezos, creyencies y ritos. Esta tradición amestao cola música folk y el rock ye lo que dio como resultáu la música celta d'anguañu, mesmo na so versión folkie, que na folk-rock, etc.

Más informacón sobre Asturies: http://www.infoasturias.com

Más información sobre la gaita d'Astuires: http://www.asturies.com/viesca/gaita