Nel 1994, una riestra músicos d'estremaos conceyos d'Asturies entamen Brenga Astur. El so enfotu nel aniciu'l camín ye esparder el conocimientu de la música celta d'orixe asturianu, mesmo na so llinia más tradicional que notres estayes más averaes al folk, ya inclusu al folk-rock. Sicasí, encadarmando siempre esti enfotu dientro la vaga xeneral de la Música Celta de los Países del Arcu Atlánticu Célticu (Irlanda, Escocia, Islla de Man, Gales, Cornualles, Bretaña, Asturies y Galiza), nesi sen inclúin tamién nel so repertoriu temes musicales d'estes otres zones.

Los instrumentos emplegaos encartien cola llinia que güei ta puxando más nestos y otros países, esto ye que xunto a dalgunos tradicionales dafechu como les gaites asturianes en Si bemol, les xiblates irlandeses, el panderu asturianu, o'l curdión, tóquense dellos otros qu'arramen per dayuri como la guitarra acústica y elléctrica, el bouzouki, el baxu elléctricu, o la batería. En cualisquier casu cúriase con pricuru que les igües de los cantares seyan bien a xeitu col espíritu célticu que'l grupu quier tresmitir y que ye l'aliendu que lu fixera biltar.

Les actividaes públiques de Brenga Astur son mui bayuroses, participando en cuásique tolos alcuentros de folk célticu y tradicional que se faen n'Asturies, n'España o per otros países. Nesi sen, Brenga percorriera yá abondos llugares d'España, Sur de Francia, Italia ya Túnez, asina como delles xires pelos Estaos Xuníos d'América. [Más información...]

Na fastera de la pedagoxía y acordies col so enfotu primeru, Brenga Astur entama otra mena d'actividaes: los nomaos "conciertos pedagóxicos", actuaciones que s'ufierten per colexos, institutos y cases de cultura a lo llargo de tola xeografía española y onde'l grupu, cola so música como filu conductor, fala d'instrumentos, de la cultura tradicional y del mundu celta tantu n'Asturies comu en xeneral. El grupu Brenga Astur ufierta un imaxinativu percurríu al traviés del mundiu celta na voz de Fernando Montes, fondu conocedor y peravezáu nesta cultura. Los sos entamos musicales desendólquense d'un xeitu prestosu, imaxinativu y pedagóxicu. El programa incluye temes celtes asturianos, bretones, irlandeses ya escoceses. Los instrumentos emplegaos abarquen dos gaites asturianes en Si bemol de tres roncones, guitarra acústica y llétrica, bouzuki, percusiones tradicionales asturianes, bodhram, curdión, xiblates irlandeses, baxu llétricu y batería.